2013年6月18日 星期二

2013 父親節


今日第一個行程係去荃灣,

老婆姊妹們 book 咗漁屋食放題,同外父慶祝父親節



漁屋食過兩次都係喺如心廣場,呢次因為姨仔訂錯地方,

結果去咗荃新天地分店



掛住食冇影相。

就質素論真係一般般,但以價錢論又確係幾抵食,

難怪經常爆滿。

食完呢個下午放題,本來各散東西,

不過幾個剛剛考完試o既細路就一齊想玩多一陣,

於是就同佢哋去咗隔離公園玩番陣






剛剛嗌走個天就開始落雨,都算好彩。

跟住我就要履行我o既承諾,同 Bryan 去油麻地現時點買 LEGO....

話說考試前同 Bryan 約法三章,如果分數達某一個標準,

就送盒 LEGO 比佢。

原本中文科撻咗Q 差少少.... 不過見佢尚算努力就放佢一馬照當佢過關啦



Bryan 同時睇中另一盒,想叫我買埋....

我情急智生,即時話如果佢全級名次去到指定目標內就送埋比佢

希望佢一兩個禮拜後會得到呢份獎品啦



Bryan 買完呢盒 LEGO,就催促我哋返屋企,話想快啲砌好佢,

結果返到屋企佢真係即刻動工,

到媽咪請完食晚飯後又繼續砌,連獎門人都唔睇

最後幾乎以一人之力完成..... 佢話好好玩哩~



喺去現時點時有段小插曲,

我比咗 Bryan 老友碩碩個老豆 Facebook's status 比 Bryan 睇,

我話人哋碩碩父親節就送盒 LEGO 比老豆,

你就要買盒 LEGO 送比你.....

Bryan 即時回應,話我都有送禮物比你架,

就係親手畫咗張父親節咭比我....

隔咗幾秒,佢個樣好似好懊悔咁,話原本唔想比我知,

想比個驚喜我,而家係我迫佢講出嚟咁咁

晚飯後返到屋企,我收到佢呢張既窩心又比佢笑死o既父親節咭,

咭面畫咗兩個火柴人o係疏化度,據了解應該就係我兩父子,

Bryan 解說係我父子坐埋一齊睇電視....

咭背都畫咗公仔,係無厘頭有隻穿咗超人斗篷o既飛天狗,

Bryan 解釋係頸巾,並唔係斗篷,至於點解畫佢上去就冇解釋。

至於內文,我都識背,

因為同一個禮拜前溫o既中文關於心意咭o既內文一模一樣 

2013年6月13日 星期四

香港迪士尼樂園大冒險家餐廳

續上文...
今日係閒日兼落大雨,卻意外地多人 (目測大部份係強國人) 。

我哋決定提早晚飯避過人潮....

順便試試迷離莊園入面o既大冒險家餐廳,

網上評價似乎不錯的說。

出乎意料,門堪羅雀....



大冒險餐廳網羅埃及、俄羅斯、摩洛哥、印度和中國美食,

亦依呢幾個國家設計唔同o既餐廳裝潢,幾有心思。

我冇留意餐牌,因為網上見有食家大讚海南雞飯,

一心嚟試吓佢~



呢個餐 $128,包一杯汽水,幾貴吓,

不過主題樂園o既食品預咗係咁貴,

質素不過不失,總好過海洋公園熊貓餐廳,又貴又難食

老婆就試咗蛋包飯



Bryan 就例牌叫兒童餐



我哋揀咗印度廳入座,因為望落啲櫈好似舒服啲




呢次試機同玩都唔夠喉,下次約埋考晒試o既表姐一齊嚟玩先~~




【完】

2013年6月12日 星期三

勇闖香港迪士尼樂園迷離莊園







迪士尼樂園新開呢個迷離莊園,Bryan 好恨嚟玩玩,

卒之等到考試最後一日,放早,就同媽咪帶佢嚟玩玩,慶祝甩難

可惜o既係天氣好差,落足成日雨,

我仲諗住好好試部新玩具家嘛

________________________________

入到園第一時間梗係去迷離莊園玩啦,



NEX 5R iso 3200 表現唔錯,開心~~




排咗半個鐘左右,yeah~ 有得玩啦



無軌式卡車類似東京迪士尼o既 Winnie the Pooh,

不過水準始終有距離,

但都好玩過香港版 Winnie the Pooh o既,



好奇怪,太空山、極速礦車、U 型遙控車都難唔到 Bryan,

但係玩呢個迷離大宅佢話有啲驚





趁雨勢減弱,我哋去咗錯覺藝術影吓相



又試吓我支魚眼鏡  



好難控制,但係好玩玩




玩完灰熊山谷極速礦車,我哋又排隊玩過迷離大宅,

因為有四條行走路線,要睇足唔同角度o既場面,

起碼要玩四次.....

結果我哋差一次就達標




【待續】